Aara se Wasseypur ( Part 1 )

By Satya Anand

Aara [mera birth place, Bihar] se Wasseypur [Jharkhand…jispe “Gangs of Wasseypur’’ ki story based hai] ki doori overnight journey hai, lekin mujhe 18 baras lag gaya.

Yeh baat 1991 ki hai. Natak ki duniya mein mere aane ka rasta bada natakiya tha. Meri poori family ka ek hi kaam tha, padhai karna aur job pakar ke sukhi jeevan bitana. Mere babuji ek teacher the. main padhai ke mamle mein sadharan tha. mere bade bhai sahib chahte the ki mera admission patna ke science college me ho jiske liye 90% marks must tha. mere 10th ka marks 64% aaye, toh bhaiyya ne kaha drama quota par tumhara admission karaya jayega. main darr gaya kyunki main bahut shy kisim ka ladka tha..zabardasti mujhe ek local natya group ‘’Navoday Sangh’’ ke director Mr. D Rajan se milwaya gaya. Mere bhaiya ne unhe bata diya tha ki who mujhe trial ke liye train kare.

Rajan bhaiya ne mujhe kaha has ke dikhao…meri toh fati padi thi ki hasi kahan se nikale…main ek chor ki tarah “heen heen heen” kar raha tha…baaki sab log meri shakal ko dekh ke thahake laga rahe the…khair…2-3 din baad main ek movie dekhi Mast Kalandar, jisme Anupam Kher, Amrish puri, Prem Chopra sahab the. Uss film me Anupam Kher sahab Gay bane the. Unka kaam mujhe achha laga tha. Shaam ko main Rajan bhaiya ke pas gaya aur Anupam Kher ka nakal kar ke dikhaya…sab khush…phir meri taiyyari shuru hone lagi…bahut dara tha…phir wo din aa gaya jab mujhe trial dena tha. 72 candidate the jinme se kisi ek ka selection hona tha….jaisa ki main pehle se hi janta tha mera selection nahi hone…lekin tab tak mere uper natak ka bhoot sawaar ho gaya tha. Galiyaan khate hue … wapas apane shehar Aara aana pada, …Uss trial ke dauran ek ladke ne ek Mime kiya tha aur main us ladke aur Mime ka fan ban gaya tha.

Wapas apne shehar ke college mein admission ki problem hui kyunki seat saare full ho gaye the. Tab ek local Neta ji ko pakda gaya…Jo mere father ke student rah chuke the aur hamare padosi. Sab samajhne ke baad Neta ji ne ek rasta nikala ki college ke ek clerk ko pakda jaye aur unhe ye bataya jaye ki natak karne ke liye, Aara ka naam roshan karane ke liye, main bahar gaya tha. Clerk sahab se unke office me hi jab mujhe milwaya gaya, to unhone kaha “hum kaise vishwas kare ki ye natak-nautanki karta hai”. Akhir Sawaal admission ka tha toh, mujhe na chahte hue bhi wahi office me hi acting kar ke unko dikhana tha. Main pareshan tha ki aise kahi bhi … chalte chalte … raste me … acting kaise hoga? Lekin koi chara nahi tha…phir maine majboori me wahi Mime kiya jo Patna me dekha tha…sab log dang rah gaye aur bole ki ye kaisi acting hai bhai. Lekin unhe kya pata ki mere pas Mime ka copy karne ke alawa koi chaara hi nahi tha. Phir clerk sahab ne rasta dikhaya, ki yahi acting ek bar principle sahab ko dikhaya jaye…phir wahi acting principle sahab ke cabin mein ki gayi….aadha hi hua tha ki unko ek zaruri kaam se jana tha…sabne mujhe college ka naam roshan karne wala kalakar batakar aur jhoothi ummedein dikhakar, Principal sahab se request kiya gaya ki ek bar pura pura natak dekh liya jaye….Bahut request ke baad Principal sahab ready hui ki sham aur shaam ko mujhe unke ghar bulaya gaya. Sab khush!!!

Meri halaat ye thi ki mujhe gussa aata tha ki ye kaun sa chutiya kam main karne laga hoon ya log karvane lage hain…kabhi bhi kahi bhii…sham ko jab principle sahab ke ghar par gaye to wahan mehfil saji hue thi…jaise ki koi mujra hone wala ho…khair karta kya? nahi karata…magar maine wohi Mime kiya…sab log Mime dekh kar khush aur suprised ho gaye, phir Principal sahab ka right-left jawab chalu ho gaye ki admission me problem hai, nahi ho sakta..lekin Principal sahab ki wife ne unhe tane marte hue kaha ‘kahan ke Principal hai aap, jab power hi nahi hai ek admission karne ka, wo bhi itna badhia aur guni bachwa ka? Clerk, Chapraasi aur kauno farak nahi…Principal sahab ne agale din drama ka naya quota type kuch likhwa ke mera admission karawa diya

Ab mera asli struggle start hua. Mere andar natak ke bhoot ne buri tarah ghus ke ghar bana liya tha… ab study mein kahan mann lagata…phir bhi study to kara hi tha, saath me ek naatak group sath stage shows chalu ho gaya..Starting mein Paper mein naam aur photo dekh kar ghar wale khush they…lekin unhe pata nahi tha ki main to puri tarah se ab rangmanch aur  kalakaar ki zindagi jeena chahne lag tha…kaafi problems ghar me badhne lage…mujhe natak ki duniya se hatane ke liye, mere babuji ne sare theatre groups ko personally jake mana kar diye ki wo log mujhe kam na de aur babuji ko koi mana nahi kar sakta tha, kyunki babuji shehar ke bahut pasandida teacher me se ek the aur aadha shehar mere babuji ke student rah chuka tha. Bahut bhayanak situation ho gayi thi, ghar ka! kyunki main bhi wo pehle wala shy kism ka ladka nahi reh gaya tha. Natak mein meri zindagi, approach, soch aur mujhe badal diya tha. Main baaghi ban gaya tha aur maine ghar me hah diya ki mujhe yahi karne diya jaye jisme mera mann lagta hai…bahut taane sunne ko milta tha… lekin muzhe clear nahi tha ki kaise kya karna hai, jaankari nahi thi.

Yeh baat 1994-95 ki hogi. Ussi dauran mujhe ek aadmi mile jinka nam hai Prem Sagar ji..Woh hamare hi town ke the par rahte Noida me the aur Delhi me music shows karte the …actually woh ghazal singer the…unhone baton baton mein bataya ki ek bihar ke ek actor hai … jinka naam hai ‘Manoj Bajpai’’ unka ek show dekhane rashtrapati aaye the. Main ghar gaya aur sochne laga ki mujhe bhi Rashtrapati award chahiye…Main us samay itna nasamjh tha ki jaise play ke liye Manoj Bajpai ko  Rashtrapati award mila hai , to mujhe bhi chahiye, jab ki Rashtrapati to sirf play dekhne aaye the…Tab bahut aur sare vichar, sar chad ke bolne kya … nachne laga mere uper. Phir maine Delhi jane ki socha, lekin janta tha ye itna aasan nahi hai, jitna gharwalo se lad zhagadkar ke yaha natak kar raha hoon. Phir maine planning karke  jane ko socha. Delhi ke college me admission lene ki planning mujhe sahi lagi. Delhi gaya lekin mujhe admission nahi mila kyunki main late ho gya tha…sab admission closed ho gaya they. Phir maine ek saal aise hi nikale,..sabko khush kar ke, padhai karke aur kam se kam natak karke. Phir aakhir wo din aa hi gaya jab ghar me ye baat behas ban chuki thi ki mujhe akhir zindagi me karna kya hai? Bahut garm mahaul tha ghar ka. Maine babuji se bola ki mujhe Rashtrapati award chahiye jiske liye Delhi jana padega. Babuji kuch pal chup rahe fir plastic ka  juta nikal ke marna chalu kiye,,.khub mara[waise babuji marne ke nature wale nahi the] aur Manoj Bajpai ko khub gali diya unhone [ye baat Manoj bhaiya ko batayi thi maine ‘Gangs of Wasseypur ki shooting ke time’ wo has rahe the.]

Jab wo mujhe maar rahe the uss waqt mujhe lag raha tha ki ‘ye aadmi mera baap nahi ho sakta, jo meri bhavna ko nahi samajhta ,wo baap kaise ho sakta hai?’ Baad me yeh mere andar buri tarah baith gaya. Hamari baatchit band ho gayi. Phir kuch dino ke baad maine jaise apna faisala sunate hue kaha ki main to Delhi jaunga, agar aap saath dete hai to achhi baat hai…Aur saath nahi denge to aur bhi achhi baat hai…Kuch mahino baad main ek chutiye [naam nahi lunga, abhi bihar ka ek bada patrakar hai wo aajkal] ke bharose me delhi jana ka than liya, socha ki apana pahchan ka hai .main ghar se lad ke nikal gaya dilli ko.mere liye anjan sahar.us chutiye ne nehru vihar,near , jo north campus delhi ke pas hai waha ka pata diya tha. Jab bahut dhundhne ke baad waha pahucha to wo address tha hi nahi waha, ye bat 1997 ki hai. Tab ke tab wapas Delhi station aake patna ki train pakad ke next day ghar chala aaya. Sabne tane mare, mazak udaya. Main shant tha. Wapas ek mahine bad fir se gaya Delhi. Waha 3-4 din raha, pata lagaya NSD, Shriram Centre ke bare me aur wapas ghar aa gaya. Is baar bhi wahi hua…wahi tane…wahi mazaak. Phir 3-4 months ke bad ek din babuji aur bhaiya baat kar rhe the…Mujhe bulaya gaya aur gusse me hi sahi lekin babuji ne kaha ki—ja sala jab tumko yahi karna hai to yahi kar, paisa main bhej diya karunga..baap hun to apna farz nibhaunga.

Ab main Delhi aa gaya. Ghar ke log poori tarah se kush nahi they kunki unhe is field ki jankari nahi thi aur mere future ke bare chinta thi, jo har baap ko hoti hai…Uss waqt mujhe laga tha main galat tha, yeh mere baap hi hain. Phir Asmita theatre group join kiya…kaafi mushkilo ke baad…fir natak aur pachaso problems aaye par sab chhu ke nikal jate the, kyunki main apni duniya me jeene, saans lene laga tha. Mera sapna tha NSD mein admission, phir zindagi bhar natak karna aur karwana , aur NSD ke liye gruduation must tha…Meri study Aara me chal rahi thi, main exam ke ek mahine pehle aata tha aur exam de ke wapas Delhi. Tabhi Bihar me jam ke chori hoti thi…Exam me Lalu ji ke time me toh graduation aur natak dono saath saath chalne laga.

Asmita group me natak karne laga. Mera pehla play ka naam tha ‘’Rakt-Kalyan’’ jisme lead actor tha Deepak Dobriyal. Luckly mujhe bhi ek chhota sa character mila. Aise hi din bitne lage. Suddenly ek din ek news mila hume ki piyush Mishra hamare group ke sath jud rahe hai aur apna solo performance karne wale hai ‘’An evening with Piyush Mishra’’ ke naam se. Mujhe unka attendant banaya gaya. Wo jab bhi Shriram center ke basement me apna rehearsal karte the main unki seva ke liye waha hota tha. Jo mere liye garva aur kismat ki bat thi [after shooting of wasseypur ek din maine Piyush bhai se mila to unhone bola —Delhi gaya tha India Today me mera interview inikala hai, tu kharid le…Maine pucha kya hua? Unhone bola — chutiye usme mujh se puchha gaya tha ki mere pasandita actors ke bare me. Bahanchod tere bhi naam bola hai maine……I was shocked…maine puchha kya? Haan bahanchod tu bhi mere pasandita actors me se ek hai……….mujhe lagta hai ki wo din aur Piyush bhai ki kahi bate mere life ki ek bahut badi achivment hai…….thanx Piyush bhai ] fir ek saal baad mera graduation ho gaya aur main mentally bahut positive tha NSD enterance exam ke liye. NSD ka form submit kiya aur intezar karne laga. Tabhi kismet aur samay ne fir se sath chhoda. NSD mein, Mandi house me bawal macha hua tha. Hua ye tha ki acting ki total 20 seats mein se 1996 mein 5-6 aur 1997 mein shayad 6-7 Bihariyonka ka selection hua tha. Aur Delhi ke kisi bande ka nahi hua tha…toh Delhi ke actors ne bawal machaye tha, ki itne sare Bihariyon ka ka selection kyon? Aur iska dosh diya ja raha tha, us samay ke NSD ke Principal Shri Ram Gopal Bajaj ji ko. Kyonki Bajaj ji Bihar se the….

Sachhai kya thi mujhe abhi tak sahi tarike se nahi pata, par bawaal, virodh charam par tha. Baad me shayad court mamla bhi hua tha, khair iska natiza ye hua ki us saal Bihariyon ka ka form reject kiya jane laga…usme se ek Bihari main bhi tha. Mujhe interview call nahi aaya…Main mentally bimar hone laga. Natak se katne laga, reharshal se katne laga. Arvind ji bhadakne lage, gussa karne lage [ jo wo sahi they ]. Meri unse bhi behas ho gai. Aur natak, Delhi sab mujhase katane lage. Yaha tak ki apani zindagi se bhi moh khatam ho gaya aur main usi mental condition me raat ko Dariya Ganj  ke pas wale ISBT  bus adde  chala gaya, aatmahatya karne, us samay main Model Town me rehta tha…aur ISBT raste me aata tha…babi badi sadke, khub gaadiyan aati jati thi wahan pe. Road ke kinare main kuch time baith raha…ek ciggarette pee aur phir green signal hone ka wait karne laga, kyunki green signal hote hi sare ke sare buses aur trucks waha se aandhi ki tarah nikalathi thi. Main ekdum clear tha ki green signal hoga main 3-4 kadam jaunga aur main mukt ho jaunga  … sada sada ke liye … is dukh … is struggle se … aur who bhi bina takleef ke.

Green signal hua main bhi ready hua tabhi achanak pata nahi kaha se ek banda aaya aur road cross karne ke liye dauda…aur palak jhapakte  hi ek truck ne use uda diya…Main shocked wahi ka wahi khada reh gya…Meri gand phat ke hath me aa gayi. Public, police sab aaye. Traffic Jam lag gaya. Main agle 1-2 ghante tak kuch sochane samajhane ke layak nahi tha. Chup chap ek jagah par baitha raha. Subah mein ghar gaya..main dara hua tha, blue line bus me baithne me dar lag raha tha. Room par jate waqt hi maine faisla kar liya tha ki main wapas apne ghar, apane shahar Aara laut jaunga hamesha ke liye. Aur kismat ko kuch aur hi manzoor tha……….

For concluding and 2nd part of Satya’s journey, please click below…

http://www.madaboutmoviez.com/2012/06/aara-wasseypur-tak-part/

Advertisements

7 thoughts on “Aara se Wasseypur ( Part 1 )

    • ANDHA YUG KO BHULA NHI DIYA…….ISS BLOG KA JO TRACK THA  USKO FOLLOW KIYA GAYA HAI…….RAKT – KALYAN  PLAY KE ALAVA  KISI VI PLAY KA ZIKR NHI HUA HAI ………….YAHA EK JOURNEY KI BAAT HO RHI HAI NA KI BIO GRAPHY KI.PLAYS TO 30-40 KIYE HONGE..AUR KIE PLYS KE KAIO SHOWS…..PAR YAHA KISI KA ZIKRA NHI HAI

  1. Bahut hi baadiyan post likha hain aapne Sirjee.
    Last Paragraph to ekdum zabardast hain.
    Mujhe GOW se zyada aapki kahani zyada Rochak aur Dilchasp lagi.

Share your Thoughts

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.